Beta ada pasiar-pasiar di dalam jaringan (daring). Beta pung mata kelalapan pi mana-mana. Beta cari-cari kabar-kabar yang beta bisa baca, biar deng cara bagitu beta bisa olah otak. Kata orang olah otak tu, deng cara baca, tulis, batanya kiri-kanan deng taman dong yang kata orang bilang, diskusi. Ini dong cara-cara olah otak.
Beta pasiar tarus-tarus bagini, katumu deng Opa Pamudya Ananta Toer. Na, tau-tau te ini hari tanggal enam bulan dua. Tiap tanggal enam bulan dua orang inga baptua Pram. Beta masok pi kamar wikipedia.org ko lia-lia coba. Batul! Opa Gugel saa, pake logo kusus ini hari ko inga baptua Pram pung hari bae andia, hari lahir.
Ma, orang musti tau, baptua Pram tu lahir taon barapa to? Baptua lahir taon 1925. Na, jadi baptua su tua sakali ee. Baptua ju su sonde ada lai. Dia su almarhum. Dia pung hari meninggal andia, tanggal 30 April 2006. Jadi su agak lama, wuang?
ADVERTISEMENT
SCROLL TO RESUME CONTENT
Banya orang tau, baptua Pram tu dia penulis produktif. Penulis produktif tu, apa? Penulis produktif tu andia, orang yang tulis dia pung ide, gagasan, dia ramu dari banyak baca buku deng pengalaman idop. Dia tulis terus. Baptua Pram tulis banya buku yang orang balek pi bahasa laen dong. Ada novel sejarah, cerita pendek, jurnal-jurnal, deng masi banya yang laen dong. Dia pung buku talalu banya, ma orang dong baca sonde bosan-bosan.
Ini hari banya artikel di blog kompasiana.com. Ada artikel yang orang tulis ko jadi sama ole-ole ko inga baptua Pram pung ultah. Conto ke ada satu orang pung nama: Anggi Afriansah, dia tulis judul: Pramudya Ananta Toer: Tulis, Tulis dan Tulis … . Jadi, ini hari ada apa ko? Dia pung jawap andia, ini hari Pramudya Ananta Toer pung hari bae, hari ulang taon. Coba baca ju di kompas.com.
Ini pesan penting dari baptua Pram: Tulis, tulis, tulis. Sekalipun orang tidak membaca tulisanmu, suatu hari kelak akan berguna. Na, karmana? Botong jang barenti tulis ee… iko bapa Pram pung saran ee…
Heronimus Bani
